RAGO DA WUTSIYAR KARE

Kamfanin Golden Neo-Life Diamite International,  wanda aka fi sani da GNLD a takaice,  da magunguna da sinadaran da suke inganta jiki bayan an ci abinci. Suna taimakawa dan adam ya zafin jikinsa ya daidaita,  kuma suna gyara fatar jiki da sauransu.  Magungunan GNLD suna karawa jikin da ya ci ya koshi kuzari,  don haka ake musu lakabi da provitality.




Shi wannan kamfani yana daga tsofaffin kamfanonin da suka jima suna gudanar da kasuwancin kai tsaye zuwa ga mai bukata,  watau Direct Marketing. Da haka suka samh nasara a kasashe da dama ciki har da Afirka ta Kudu.
.
Sai dai lissafinsu bai yi daidai ba yayin da suka shigo Nijeriya,  mafi yawan magungunansu na bukatar sai an ci an koshi an yi katon ciki kamar randar lahira tukunna zai yi aiki yadda  ake so,  har ila yau kuma ga tsada ninkin farashin da za a iya samun makamancinsa a kasuwa.  Wadannan dalilai suka sa magungunan GNLD basu samu karbuwa yadda suka yi tsammani ba.
.
Ganin haka sai turawan suka ja jikinsu bayan sun yi kananan kamfanonin da za su ci gaba da tallata musu kayayyakinsu ta wata irin hanya mai rikitarwa.  An samu bullowar kananan kamfanoni da yawa da suka yi rijista karkashin GNLD wadanda ke mazaunin tsani da ake jingina daga masu sayen kaya zuwa babban kamfanin.  Wannan ta sa aka samu ambaliyar kamfanoni da suke yi wa jama'a albishirin samun aiki cikin sauki. Yanzu haka duk inda ka duba a manya da kananan titunan kasar nan za ka iya cin karo da wata 'yar takardar sanarwar cewa kamfani kaza yana daukar mutane aiki bisa albashi kaza. Kodayake akwai wasu dalilan da suka jawo yawaitar irin wadannan kamfanoni, amma babba daga ciki shi ne samun tagomashi daga kamfanin GNLD.
.
Yadda suke yi kuwa,  da zarar ka nuna sha'awar kana so a baka aikin,  sai a zaunar da kai a yi maka huduba a nuna maka irin romon da za ka samu a wajen sayar da kayayyakin iri - iri,  sannan a nuna maka irin daukakar da za ka samu cikin kankanin lokaci. Misali,  za a iya ce maka,  za ka samu mallakar katafaren gida da mota da kuma tikitin zuwa kasashen duniya domin hutawa duk shekara da sauran romon baka da dama.  Suna da wani irin inji da suke kira 'Quantum Resonance Body Analyzer' sun ce yana iya duba duk ilahirin cutar da ke jikin dan adam cikin kankanin lokaci kuma ya rubuta maganin da ya dace da shi.  Sai su yi wa mutum romon cewa idan ya mallaki injin zai rika duba mutane kullum daga 10 zuwa 20 har 50 ma, kowanne akan kudi akalla dubu 3. Wadannan kudaden duka nasa ne.
.
Bayan sun gama hure wa mutum kunne sai kuma su bukaci ya yi rijista domin samun damar more garabasar. Kudin rijistar yana kamawa daga dubu 9 zuwa dubu 13. Idan mutum ya yi rijistar sai a bashi lasisi a matsayin kwararren masanin harkokin ci da sha domin lafiya (Nutritionalist),  sai kuma a bukaci ya yi ya soma sayen magungunan yana sayarwa jama'a ko kuma ya yi amfani da su.  Za a nuna masa cewar shi kadai aka sayarwa magungunan akan farashi mai rangwame,  amma yana iya kara ribar duk da ya ga dama.  Yawan cinikinka yawan ribar da za ka samu a matsayin tukuici.
.
Binciken da na yi,  da yawan wadanda suka yi rijistar nan basu samu dacewa da romon bakan da aka yi musu ba,  akasari ma dai maimakon samun wadata da yalwa,  sai ma karuwar talauci da suka yi saboda an bar su da robobin magunguna babu mai saye.

Don haka nake jan hankalin jama'a musamman wadanda ke ganin za su zama ma'azurta saboda tayin aikin da suka samu daga irin wadannan kamfanoni da su yi komai ido bude.  Mafi akasarin masu tallan ayyukan nan,  raguna ne masu wutsiyar karnuka,  maimakon su baka naka ma suke hari.  Idan kuwa ba ka ji ba,  ta yiwu nan gaba karfi da yaji ka koma dan mai ganye ba tare da ka yi gado ba.

.
Me da me kamfanin Swiss Golden ya kunsa?  Mu hadu a rubutu na gaba.